USD
Ақмола облысының Целиноград ауданында синтетикалық есірткі дайындаумен айналысқан зертхананың жұмысы тоқтатылды. Операция облыстық прокуратураның бастамасымен ұйымдастырылған жедел-іздестіру шаралары барысында жүргізілген.
Полиция қызметкерлері 17 тамызда аудан аумағында орналасқан зертхананы анықтап, оның қызметін тоқтатқан. Тінту кезінде жарты келіден астам дайын есірткі өнімі, химиялық прекурсорлар және тыйым салынған заттарды өндіруге пайдаланылған зертханалық құрал-жабдықтар табылған.
Анықталған заттарға қатысты тиісті сараптамалар тағайындалды. Зертхананы ұйымдастыруға қатысы бар адамдар уақытша ұстау изоляторына қамалды.
Прокуратураның мәліметінше, жыл басынан бері Ақмола облысында құқық қорғау және арнайы органдардың бірлескен жұмысы нәтижесінде 432 келіден астам есірткі тәркіленген.
Сонымен қатар осы кезеңде синтетикалық есірткі өндіретін үш зертхананың, 18 фитозертхананың және есірткі жеткізудің бес арнасының жолы кесілген.
Құзырлы органдар өңірде есірткі бизнесіне қарсы күресті жалғастырып жатыр. Прокуратура заңсыз есірткі және психотроптық заттар айналымына қатысқандар қылмыстық жауапкершілікке тартылатынын ескертті.
