Атырау тұрғыны 2,5 млн теңге талап етті деген күдікпен қамауға алынды

Атырауда 2,5 млн теңге бопсалады деген күдікпен ер адам ұсталды

Атырау облысында жергілікті тұрғыннан 2,5 млн теңге талап етті деген күдікпен 35 жастағы азамат ұсталды.

Полицияның хабарлауынша, күдікті Индер ауданының тұрғыны. Оны облыстық полиция департаментінің экстремизмге қарсы іс-қимыл басқармасының қызметкерлері арнайы іс-шара барысында қолға түсірген.

Күдіктінің тұрғылықты жерін тексеру кезінде 2,2 млн теңге көлеміндегі ақша қаражаты тәркіленген. Тергеу мәліметтері бойынша, аталған қаражат бопсалау арқылы алынуы мүмкін.

Оқиғаға қатысты сотқа дейінгі тергеу амалдары жүргізіліп жатыр. Қылмыстық-процестік кодекстің 201-бабына сәйкес, тергеу барысына байланысты қосымша ақпарат жарияланбайды.