USD
Атырау облысындағы мемлекеттік мектептердің бірінде педагогты оқу орнының жөндеу және тазалық жұмыстарына тартуға қатысты дау туындады. Оқиға әлеуметтік желіде жарияланғаннан кейін көпшілік назарын аударып, білім басқармасының тексеріс бастауына себеп болды.
Мұғалімнің айтуынша, жаңа оқу жылына дайындық кезінде оған өзіне тиесілі емес жұмыстарды орындауға тура келген. Педагог бірнеше күн бойы кабинетті тазалап, еден жуып, шаң сүртіп, қабырғаларды әктеген. Жұмысқа қажетті кейбір тазалық құралдарын да өз қаражатына сатып алғанын айтқан.
Ұстаз бұл талаптарға оқушылардың сабақ өтетін бөлмесі талапқа сай болсын деген ниетпен келіскенін жеткізді. Алайда еңбек демалысында жүрген кезінде де мектеп әкімшілігі тарапынан қосымша тапсырмалар берілген.
Педагогтың сөзінше, одан баспалдаққа көтеріліп, төбедегі электр плафондары мен люстраларды тазалау сұралған. Ол мұндай жұмыстың қауіпсіздігіне алаңдап, тапсырманы орындаудан бас тартқан. Мұғалім өз міндеті балаларға білім беру екенін және өміріне қауіп төндіретін жұмыстарды атқаруға келіспейтінін атап өтті.
Оқиғаға қатысты әлеуметтік желіде жарияланған жазба мен фотоматериалдардан кейін Атырау облысының Білім басқармасы түсініктеме берді.
Ведомствоның мәліметінше, педагогтарды мектептерді жаңа оқу жылына дайындау жұмыстарына тарту туралы ақпарат бойынша қызметтік тексеріс басталған.
Басқарма мұғалімдердің еңбек құқықтары Қазақстанның еңбек заңнамасы және «Педагог мәртебесі туралы» заң арқылы қорғалатынын еске салды. Егер тексеру нәтижесінде педагогтарды заң талаптарына қайшы жұмыстарға тарту фактілері расталса, жауапты тұлғаларға қатысты тиісті шаралар қабылданатыны айтылды.
Тексеру қорытындысы қосымша жарияланбақ. Білім басқармасы педагогтардың құқықтарын қорғау мәселесі бақылауда екенін мәлімдеді.
