USD
Қайғылы жағдайда қаза тапқан Ақнәр Хамитпен сол күні пәтерде бірге болған екінші қыз – Рана әлеуметтік желіде видео мәлімдеме жасады.
Ол өзінің аты-жөнін ашық айтып, оқиға барысын егжей-тегжейлі баяндады.
Менің атым Рана. Жасым 21-де. Қазір КИМЭП университетінің 4-курс студентімін. Бұл видеоны түсіруімнің себебі – қазір көптеген хабарларда Ақнәр Гүлістанның өлімі туралы анасы мені және Дидарды кісі өлтіруші деп айыптап жатыр. Бұл шындыққа сай келмейтінін айтқым келеді, – дейді ол. Оның айтуынша, Ақнәрмен де, Дидармен де КИМЭП-те танысқан, Ақнәрмен бірге оқыған.
Рананың сөзіне қарағанда, олар әуелде өте жақын достар болған. Кейінірек Ақнәр басқа жігітпен жүре бастаған. Рана анасының жол апатынан қайтыс болуына байланысты қатты күйзелгенін де жасырмады.
2024 жылы мамырдың 20-сы күні менің анам жол апатынан қайтыс болды. Сол кездері мен қатты күйзелісте жүрдім. Сол үшін екі құрбым маған хабарласып келді. Көңіл сұрады. Анамның қырқын өткізгеннен кейін мен Алматыға қайтып келдім. Оқуымды жалғастырдым, – деп қосты ол.
Қайғылы оқиға болатын күні, яғни 18 шілдеде, Ақнәрдің өзі Дидарға хабарласып, екеуі Ранамен кездесуге келіскен.
«Сенен көңіл сұрайық» деп оны Қытай мейрамханасына шақырған. Көп тамаққа тапсырыс беріп, көңіл көтеру үшін Дидардың үйіне барған. Рана ол кештің қалай басталып, қайғылы аяқталғанын бүкпесіз баяндады. «Ақнәр алкоголь сатып алуды ұсынды. Біз де келістік оған. Стресс шығарып, көңіл-күйімізді көтерейік дедік. Сыра, аққайнар, кәрістің сусынына тапсырыс бердік. Сол кезде мен «дәрі қабылдап жатырмын, аздап ішемін» дедім. Тамақ іштік. Қыздар сыра ішті, мен ауырып жүрген соң аздап аққайнар іштім. Музыка қойып биледік, көңілді отырдық, – дейді Рана.
Бірақ кеш барысында жағдай күрт өзгерген. Ақнәрдің көңіл-күйі түсіп, ол кенеттен өзін ұстай алмай, жанжал шығарған. Рананың айтуынша, Ақнәр оған ауыр сөздер айтып, физикалық күш қолданған.
Ақнәр мені шапалақпен ұрып, жерге құлатты. Дидар да оны жұбатуға тырысты, бірақ ол өз-өзіне қол жұмсауға тырысқандай көрінді. Екеуміз оны ұстап отырдық, бірақ Ақнәр одан сайын ашуланды. Ол менің анамды, әкемді, сіңілімді қарғап, ауыр сөздер айтты. Менің үстіме мініп алып, басымды ұрды, шапалақпен ұрып, бетімнен тістеді, – деп ауыр сәттерді еске алады Рана.
Осы сәтте Дидар да қорқып, туысына аудио хабарлама жібергенін айтады. Рана өзіне қауіп төнгенін сезіп, асүйге қашып тығылған. Бірақ Ақнәр есікті ашып, оның шашынан тартып, жерге құлатып, басын ұрған.
Оны ұруға шамам жеткен жоқ. Екі бетімді, басымды қолыммен жауып отырдым. Бір кезде жұдырықпен ұра бастады. Екі қолын ұстап алдым. Ол менің маңдайымды тістей бастады. «Құтқарыңдаршы» деп айғайладым. Ешкім естімеген соң, оған «мені жіберші» деп жалына бастадым. Ол жібергенде екінші дәретханаға барып тығылдым, – дейді Рана. Ақырында 3-5 минут өткен соң Дидар есікті ашып, екеуі бірге пәтерді тексерген. Сол кезде полиция келіп, оқиғаны тіркеген.
