USD
Екібастұзда 37 жастағы ер адам полиция бөліміне жеткізілгеннен кейін қайтыс болды. Қазір оқиғаның мән-жайы анықталып жатыр.
Оқиға 11 тамызда болған. Полицияға тұрғындардың бірі аулада мас күйдегі ер адамның қоғамдық тәртіпті бұзып жүргені туралы хабарлаған. Алдын ала мәлімет бойынша, ол әйелге күш қолданатынын айтып, қорқытқан.
Оқиға орнына келген тәртіп сақшылары ер адамды ұстап, полиция бөліміне алып кеткен. Павлодар облысының полиция департаменті оның бұған дейін сотталғанын және бірнеше рет әкімшілік жауапкершілікке тартылғанын хабарлады.
Полиция бөлімінде ер адам арнайы бөлмеге орналастырылған. Біраз уақыттан соң қызметкерлер оны ес-түссіз күйде анықтаған. Оған медициналық көмек көрсетілгенімен, ер адамның өмірін сақтап қалу мүмкін болмады.
Жергілікті ақпарат құралдарының жазуынша, ер адам бөлімге жеткізілгеннен кейін шамамен жарты сағат өткен соң кезекші оның анасына хабарласып, полиция бөліміне келуін сұраған. Әлеуметтік желілерде оқиғаға қатысты видео да тараған. Кадрларда ес-түссіз жатқан ер адам бейнеленгені айтылуда.
Оқиғаның нақты себептері мен мән-жайын анықтау үшін полиция бөліміндегі бейнебақылау жазбалары тәркіленген.
Қазіргі уақытта тиісті тексеру жүргізіліп жатыр. Оқиғаға қатысты өзге де мәліметтер анықталғаннан кейін белгілі болады.
