USD
Қазақстанда білім беру және денсаулық сақтау нысандарын алдағы жылыту маусымына дайындау жұмыстары күшейтіледі. Үкімет отырысында Премьер-министр Олжас Бектенов тиісті органдар мен өңір әкімдіктеріне нақты мерзімдерді сақтауды тапсырды.
Премьер-министрдің тапсырмасына сәйкес, мектептер, балабақшалар, ауруханалар және басқа да білім беру мен денсаулық сақтау нысандары 1 қыркүйекке дейін жылыту маусымына толық дайын болуы қажет.
Сонымен қатар инженерлік желілер мен тұрғын үй-коммуналдық шаруашылық нысандарының дайындығына ерекше назар аударылмақ. Солтүстік, орталық және шығыс өңірлерде тиісті инфрақұрылым 15 қыркүйекке дейін жылуды қабылдауға әзір болуы тиіс. Қалған облыстар үшін дайындықтың соңғы мерзімі 15 қазан болып белгіленді.
Бектенов бұл жұмысты тек жауапты министрліктер мен әкімдіктер ғана емес, салалық ведомстволар да тұрақты бақылауда ұстауы керектігін айтты.
Премьер-министр бірінші орынбасары Нұрлыбек Машбекұлына жылыту маусымына дайындық барысын қатаң бақылауды және өңірлердегі жағдай туралы апта сайын есеп беруді тапсырды.
Үкімет басшысы жылыту маусымына сапалы дайындықты қамтамасыз ету, әсіресе әлеуметтік нысандардың уақытылы әзір болуын басты міндеттердің бірі ретінде атап өтті.
