USD
Омбыдағы құрылыс алаңындағы өрттен 24 жастағы Қазақстан азаматы қаза тапты
Ресейдің Омбы қаласында құрылыс нысанында болған өрттен зардап шеккен екінші адам ауруханада көз жұмды. Ресейлік БАҚ мәліметінше, марқұм Қазақстан азаматы болған.
Ер адамның денесінің шамамен 70 пайызы күйіп қалған. Ол ауыр жағдайда медициналық мекемеде ем қабылдағанымен, дәрігерлердің көмегіне қарамастан алған жарақаттарынан қайтыс болды.
Оқиға 15 тамыз күні таңертең «Кварталы Драверта» тұрғын үй кешенінің салынып жатқан ғимаратында болған. Тергеу нұсқасына сәйкес, өрт нысанның бірінші қабатында басталып, кейін ғимараттың жоғары қабаттарына тараған.
Өрт кезінде барлығы 11 адам зардап шеккен. Үш адамға медициналық көмек көрсетілгеннен кейін ауруханаға жатқызудың қажеті болмаған. Бұған дейін осы оқиғадан жарақат алған тағы бір адам ауруханада көз жұмдаған.
Осылайша, құрылыс нысанындағы өрт құрбандарының саны екі адамға жетті.
Қазір оқиғаның себептері мен өрт қауіпсіздігі талаптарының сақталуы тексеріліп жатыр. Омбы облысы бойынша Тергеу комитеті Ресей Қылмыстық кодексінің 143-бабының 2-бөлігі бойынша қылмыстық іс қозғады. Тергеу еңбек қауіпсіздігі талаптарының бұзылуы мүмкін деген нұсқаны қарастырып жатыр.
