USD
Париждегі Hôtel Drouot аукцион үйінде Францияның тарихи тұлғасы Наполеон Бонапартқа тиесілі жеке қылыш 4,66 миллион еуроға сатылып, қару Наполеонға қатысты аукционда сатылған ең құнды жәдігерлер қатарына қосылды. Бұл туралы Hôtel Drouot аукцион үйі мәлім етті.
Қылыштың бастапқы бағасы 700 мыңнан 1 миллион еуро аралығында болған. Алайда, сауда барысында қару өз құнын бірнеше есеге арттырып, 4,66 миллион еуроға (аукциондық алымдармен қоса) сатылды. Бұл сома 2007 жылы Маренго шайқасында қолданылған Наполеонның басқа бір қылышы үшін төленген 4,8 миллион еуроға жуықтап қалды.
1802–1803 жылдары Наполеон, сол кезде Бірінші консул қызметін атқарып жүрген кезінде, бұл қылышты Версаль қару-жарақ зауытының директоры, сол заманның атақты қару шебері Николя-Ноэль Бутеге арнайы тапсырыспен жасатқан. Кейін император атанған соң, Наполеон бұл қаруын өзімен бірге алып жүрген және билігінің соңында оны адал серігі, Империяның соңғы маршалы Эммануэль де Грушиге тарту еткен.
Қылыш маршалдың ұрпақтарының қолында сақталып келген. Аукцион үйінің мәліметінше, бұл жәдігер Наполеонға тиесілі ең құнды тарихи мұралардың біріне айналды.
Айта кетейік, Наполеонның жеке тапсырысы бойынша жасалған қылыштың тағы бір нұсқасы Ресейдің Санкт-Петербург қаласындағы Эрмитаж музейінде көпшілік назарына ұсынылған.
