USD
Қазақстанда ауа температурасы 44 градусқа дейін көтеріледі
«Қазгидромет» болжамына сәйкес, 11 тамызда Қазақстанның бірқатар өңірінде ауа райы құбылмалы болады. Атмосфералық фронттардың әсерінен кей жерлерде жаңбыр жауып, найзағай ойнауы мүмкін. Жекелеген аудандарда бұршақ түсіп, жел күшеюі ықтимал.
Синоптиктердің мәліметінше, солтүстік өңірлерде және оңтүстік-шығыстың таулы аймақтарында қатты жаңбыр жауу қаупі бар. Ал елдің орталығы мен оңтүстігінде негізінен жауын-шашынсыз ауа райы сақталады.
Қазақстанның солтүстік-батысы, солтүстігі мен шығысында түнгі және таңғы уақытта тұман күтіледі.
Ауа температурасы өңірлерге қарай әртүрлі болады. Күндіз батыс пен орталықта термометр бағаны +27…+39°C, солтүстік-батыс пен солтүстікте +25…+35°C шамасында болады.
Шығыс пен оңтүстік-шығыс облыстарда күндіз ауа температурасы +30…+42°C аралығында күтіледі. Ал оңтүстік өңірлерде аптап ыстық сақталып, температура +37…+44°C дейін көтерілуі мүмкін.
Синоптиктер тұрғындарға ауа райының өзгерістерін ескеріп, әсіресе найзағай мен қатты жел кезінде қауіпсіздік шараларын сақтауға кеңес береді.
