USD
Қостанай облысының Әулиекөл ауданында егін жинау жұмыстары басталған алғашқы күні комбайн өртеніп, оқиға бейнежазбаға түсіп қалды.
Оқыс жағдай 10 тамызда «Қайсар-Агро» ЖШС-нің егіс алқабында болған. Шаруашылық басшысы Абдул-Ваған Митаевтың айтуынша, сол күні ауа температурасы 40 градусқа жуықтаған.
Оның сөзінше, комбайн қажетті өрт қауіпсіздігі құралдарымен жабдықталған. Техникада өрт сөндіргіш, 30 литрлік су қоры және өртті ауыздықтауға арналған арнайы құралдар болған.
Алайда жалын қозғалтқыш орналасқан бөліктен шыққан. Өрттің таралуы соншалықты жылдам болғандықтан, бірнеше минуттың ішінде комбайнды толық шарпыған.
Қазір өрттің нақты неден шыққаны белгісіз. Шаруашылық өкілдері оқиғаның бірнеше ықтимал себебін қарастырып жатыр.
Алдын ала есеп бойынша, өрттен жойылған ауыл шаруашылығы техникасының құны шамамен 100 млн теңгені құрайды.
