USD
Ақтөбе қаласындағы «Нұр Ғасыр» мешітінде Құран Кәрімді жатқа және мәнерлеп оқудан XV республикалық байқау өтті. Қазақстан мұсылмандары діни басқармасы ұйымдастырған жарысқа еліміздің әр өңірінен 80 үміткер қатысты.
Байқау қорытындысы бойынша жеңімпаздар мен жүлдегерлерді Бас мүфти, ҚМДБ төрағасы Наурызбай қажы Тағанұлы марапаттады. Жүлде қоры демеушілердің қолдауымен қалыптастырылған.
Құранды толық жатқа айту санатында Маңғыстау облысының өкілі Рахымжан Ержанұлы үздік атанып, басты жүлде ретінде автокөлікке ие болды.
Бұл санатта екінші орынға Ұлытау облысынан келген Ахмад Махмадраджабұлы лайық деп танылып, 5 млн теңге алды. Үшінші орын иегері Нұртілеу Серікұлына 4 млн теңге, төртінші орын алған Бекзат Дулатұлына 2 млн теңге, ал бесінші орын иегері Мансұрхан Сарварханұлына 1,5 млн теңге табысталды.
Құранның 20 парасын жатқа оқу бағыты бойынша Астана қаласының өкілі Айқын Ақылбекұлы бірінші орын алып, 3 млн теңге жүлдеге ие болды. Екінші орын алған Нұрислам Фархадұлына 2 млн теңге, үшінші орын иегері Рахимәлі Хожаниязұлына 1,5 млн теңге берілді. Төртінші орынға Мұхаммад Хамзаәліұлы, бесінші орынға Махмұт Жолдасұлы ие болып, тиісінше 800 мың және 500 мың теңге алды.
10 параны жатқа оқу бойынша Алматы облысының өкілі Мұхаммед-Жүсіп Нұрасылұлы жеңімпаз атанып, 1,5 млн теңге алды. Екінші орынды Омар Махамбетұлы иеленсе, үшінші орын Біләл Нәдірұлына бұйырды. Оларға сәйкесінше 1 млн және 750 мың теңге табысталды.
Ал Құранды мәнерлеп оқу номинациясында Павлодар облысының өкілі Нұрмұрат Абдулла үздік деп танылып, 700 мың теңге иеленді. Екінші орынға Мұсабек Мәделіұлы, үшінші орынға Хабибулла Исмаханұлы жайғасты. Жүлдегерлерге 500 мың және 300 мың теңгеден табысталды.
Байқау барысында ең жас қарилар да назардан тыс қалмады. 10 пара бойынша бақ сынаған Шығыс Қазақстан облысының 9 жастағы Ахмет Нұрланұлы мен Қарағанды облысының 9 жастағы Әбділәзиз Әбдулбасит «Көрермен көзайымы» аталымымен марапатталып, әрқайсысына 300 мың теңгеден берілді.
Жарысқа қатысып, жүлделі орындарға іліге алмаған үміткерлердің әрқайсысына да ынталандыру ретінде 80 мың теңгеден табысталды.
