USD
Қазақстанда Конституцияның қабылдануына орай жарияланған рақымшылық аясында 1 344 адам жазасын өтеуден босатылды. Бұл туралы Ішкі істер министрлігі хабарлады.
Ведомствоның мәліметінше, рақымшылық туралы заң күшіне енгеннен кейін барлық өңірлік бөлімшелерде сотталғандардың құжаттарын әзірлеу және оларды соттарға жолдау жұмыстары басталған.
ІІМ Қылмыстық-атқару жүйесі комитеті төрағасының бірінші орынбасары Нияз Рыспаевтың айтуынша, бүгінге дейін соттардың қарауына 10 мыңнан астам материал жіберілген. Оның шамамен 4,4 мыңы қылмыстық-атқару жүйесі мекемелері тарапынан, ал 6,9 мыңнан астамы пробация қызметтері арқылы дайындалған.
Қазіргі уақытта соттар мыңнан астам материалды қарап, бірқатар шешім шығарды. Соның нәтижесінде қылмыстық-атқару жүйесі мекемелерінен 620 адам босатылды. Олар бостандыққа шыққаннан кейін әкімшілік қадағалауда болады.
Бұдан бөлек, пробация есебінде тұрған 724 азамат рақымшылыққа ілініп, жазасын өтеуден босатылды. Тағы 730-дан астам сотталғанның жаза мерзімі қысқартылды.
ІІМ өкілдері рақымшылық әрбір сотталғанға жеке тәртіппен қолданылатынын атап өтті. Әр іс бойынша материалдар сотқа ұсынылып, түпкілікті шешімді тек сот қабылдайды.
