USD
Қазақстандық хирургтер жаңа туған нәрестенің денесінен салмағы 2 келі болатын ірі ісікті алып тастады. Сәби 18 тамызда дүниеге келген. Оның туған кездегі салмағы 4 келі болған, яғни ісіктің салмағы баланың жалпы салмағының жартысына тең.
Нәресте дүниеге келгеннен кейін бірден оның жағдайын мамандар бақылауына алған. Неонаталдық реаниматологтар мен хирургтерден құралған медициналық топ перзентханаға барып, сәбиді Балаларға шұғыл медициналық көмек көрсету орталығына жеткізді.
Бала жансақтау бөліміне жатқызылып, шұғыл операцияға дайындалды. Дәрігерлердің айтуынша, хирургиялық араласуды кейінге қалдыруға болмайтын. Мамандардың бағалауынша, уақытында ем жасалмаса, ісік алдағы айларда қатерлі сипатқа ауысуы мүмкін еді.
Келесі күні хирургтер операция жасап, ісікті толық алып тастады. Мамандар бұл жағдайды медициналық тәжірибедегі күрделі операциялардың бірі ретінде бағалады.
Балаларға шұғыл медициналық көмек көрсету орталығы бөлімінің меңгерушісі Саматбек Мырзахметтің айтуынша, нәрестеде сегізкөз-құйымшақ аймағында дамыған тератома анықталған. Мұндай ісік құрамында сүйек және жұмсақ тіндермен қатар кистозды қуыстар сияқты әртүрлі құрылымдар болуы мүмкін.
«Ісіктің салмағы 2 келі болды. Баланың туған кездегі салмағы 4 келі екенін ескерсек, оның денесінің шамамен жартысын ісік алып жатқан. Операция сәтті өтті. Ісікті алып тастағаннан кейін бірден пластикалық ота жасалды. Қазір тігіс орны көзге түспейді және болашақта балаға кедергі келтірмейді», — деді дәрігер.
Операциядан кейін нәрестенің жағдайы тұрақталған. Қазір оның денсаулығы жақсы, ал жақындары баланы үйіне шығаруға дайындалып жатыр.
