USD
Павлодар облысында ата-анасының қамқорлығынсыз қалған қыздың тұрғын үй алу кезегіне қатысты дауы сотта шешілді. Шенеуніктердің әрекетсіздігі салдарынан ол мемлекеттік баспана кезегінде алты жылын жоғалтқан.
Іс бойынша белгілі болғандай, балалар үйінде тәрбиеленген Б. есімді азамат 2008 жылы заң бойынша тұрғын үйге мұқтаж ата-анасының қамқорлығынсыз қалған бала ретінде кезекке қойылуы тиіс болған. Алайда жауапты органдар бұл міндетті уақытында орындамаған. Нәтижесінде қыздың аты тұрғын үй кезегіне тек 2014 жылы енгізілген.
Кейін оның мәселесі тағы да күрделене түскен. 2023 жылы уәкілетті орган оны басқа елді мекенге көшіп кетті деген негізбен тұрғын үй кезегінен шығарған.
Талапкер мәселені сотқа жеткізбей шешуге тырысқан. Ол кезекке бастапқыда қойылуы тиіс болған 2008 жылғы мерзімді қайтаруды сұраған. Алайда мемлекеттік орган оның кезегін тек 2014 жылдан бастап қалпына келтіруге келіскен. Осыдан кейін әйел сотқа жүгінуге мәжбүр болған.
Сот барысында қыздың кезінде тұрғын үй кезегіне қойылмауына қорғаншылық органдары мен кейін таратылған балалар үйі қызметкерлерінің өз міндеттерін тиісті деңгейде орындамауы себеп болғаны анықталды. Ол кезде талапкер кәмелетке толмағандықтан, өз құқықтарын өз бетінше қорғау мүмкіндігі болмаған.
Сонымен бірге сот заң талаптарына сәйкес жетім балалар мен ата-анасының қамқорлығынсыз қалған азаматтарды тұрғын үймен қамтамасыз етілгенге дейін тиісті есептен шығаруға болмайтынын ескерді.
Нәтижесінде сот лауазымды тұлғалардың әрекетсіздігін және қабылдаған шешімдерін заңсыз деп таныды. Талапкердің тұрғын үй кезегіне қатысты құқығы толық көлемде қалпына келтірілді.
Енді оның тұрғын үй кезегіне қойылған күні ретінде 2008 жыл есептеледі. Осылайша, азамат кезекте жоғалтқан алты жылын қайтара алды.
Сот шешімі заңды күшіне енді.
