Қазақстандық оқушылар халықаралық олимпиадада 6 медаль жеңіп алды

Қазақстандық оқушылар физика, химия және биология бойынша халықаралық жасөспірімдер олимпиадасында 6 медаль жеңіп алды. Бұл туралы Оқу-ағарту министрі Асхат Аймағамбетов Telegramм арнасына жазды.

Оқушыларымыздың халықаралық аренадағы жеңісті жолы жалғасып жатыр. Бүгін қазақстандық оқушылар физика, биология және химия пәндері бойынша халықаралық жасөспірімдер олимпиадасында 6 медаль жеңіп алды. Құрама қоржынында 1 күміс пен 5 қола бар. Былтыр оқушыларымыз дәл осы олимпиадада 3 қола медаль иеленген еді. Осылайша, балалар биыл рекорд жаңартты. Зияткерлік сайыс Колумбияның Богота қаласында өтті. Оған әлемнің 60 елінен 300-ге жуық бала қатысты. Жүлдегерлерді жоғары нәтижемен құттықтаймын! Оқушыларға жаңа жеңістер тілеймін, – деп жазды Асхат Аймағамбетов.

Еске сала кетсек, бұған дейін министрдің Балалар жылын қорытындылағанын жазған болатынбыз.