Күршім-Үлкен Нарын тасжолында 1 тонна шаянды заңсыз әкеле жатқан тұрғын ұсталды

Шығыс Қазақстан облысының тұрғыны бір тоннадан астам шаянды құжатсыз алып жүрген.

Полиция қызметкерлерінің мәліметінше, рейдтік іс-шараларды өткізу барысында Күршім-Үлкен Нарын тасжолында Ұлан ауданының шаяндарды тиісті құжаттарсыз тасымалдаған 44 жастағы тұрғынының басқаруындағы ГАЗель автокөлігі тоқтатылған. Көлікте жалпы салмағы 1 241 келі болатын 92 қап тірі шаяндардың бар екені анықталды. Залал сомасы – шамамен 7,7 млн теңге.

Сотқа дейінгі тергеу барысында көлік жүргізушісі шаяндарды бұрын белгісіз адамдардан сатып алғанын, содан кейін оларды көлікке тиеп, сату үшін облыс орталығына шығуды жоспарлағанын жеткізді, – делінген хабарламада.

Еске сала кетсек, осы өңірде бұған дейін ұсталған шаян тасымалдаушы да дәл осындай сылтау айтқан болатын. Ол да 44 жастағы азамат.

Қазір ҚР ҚК-нің 335-бабы 1-бөлігі бойынша сотқа дейінгі тергеу жүргізіліп жатыр.