Полицияға 99 рет қоңырау шалған астаналыққа айыппұл салынды

Полицияға 99 рет қоңырау шалған астаналыққа айыппұл салынды

Полиция қызметкерлерінің мәліметінше, жыл басынан бері елорданың 40 жастағы тұрғыны полицияға 99 рет қоңырау шалған. Барлық қоңырау шалулар бойынша дереу қызмет көрсетілген, алайда қоңыраулардың бір-екеуі ғана полицияның араласуы қажет оқиғаларға қатысты болған. Қоңыраулардың көп бөлігі жалған болып шықты, бірақ әрбір шалынған қоңырау бойынша полицияның кешенді күштері, кейбір жағдайларда жедел-тергеу топтары қызмет көрсетуге шыққан.

Мәселен, жоғарыда аталған азаматтан полицияның 102 арнасына сағат 04.24-те Абай даңғылындағы супермаркеттің жанында белгісіз ер адам пышақпен жүріп, адамдарға қауіп төндіріп жүргені туралы бірнеше қоңырау келіп түсті. Қоңырау шалушы тез әрекет етуді сұраған. Оқиға орнына дереу полиция жасағы шыққан. Алайда тексеру барысында факті расталмады.

Полиция қызметкерлері қоңырау шалушының жеке басын анықтады. Ол өз әрекетін мойындап, қоңырауларды мас күйінде шалғанын айтты. Құқық бұзушы ҚР ӘҚБтК-нің 438-бабы 1-бөлігі бойынша әкімшілік жауапкершілікке тартылып, оған 30 АЕК мөлшерінде айыппұл салынды.

Сонымен қатар, оған қатысты қоғамдық орында алкогольдік ішімдіктерді ішкені үшін ҚР ӘҚБтК-нің 440-бабы бойынша әкімшілік хаттама толтырылды. Қазір Астана қаласының полиция департаменті залалды өндіріп алу үшін азаматтық сотқа материал дайындап жатыр.