Семейде 481,8 млрд теңгеге заманауи ЖЭО салынғалы жатыр

Семей қаласында заманауи жылу электр орталығы салынады. Бұл туралы бүгін Абай облысының әкімі Нұрлан Ұранхаев мәлімдеді.

ЖЭО салу жобасы Абай облысының әлеуметтік-экономикалық дамуының кешенді жоспарында көзделген. Облыс әкімі тұрғын үй-коммуналдық шаруашылығы және инфрақұрылымды дамыту саласында 732,9 миллиард теңгеге 13 іс-шара қамтылғанын атап өтті.

Президенттің тапсырмасына сәйкес және Үкіметтің қолдауымен кешенді жоспарға Семей қаласында заманауи жылу электр орталығын салу жобасы (481,8 миллиард теңге) енгізілді, - деді әкім Үкімет отырысында.

Сондай-ақ жылу көздерін, электр, сумен жабдықтау желілерін, кәріз-тазарту құрылыстарын салу және реконструкциялау жобалары жүзеге асырылады.

Жалпы, Абай облысын әлеуметтік-экономикалық жағынан дамытуға 2 триллион теңгеге жуық қаржы бөлінеді.