Шетелдік көліктерді заңдастыру: 9 мыңға жуық өтінім түсті

Бүгін Қазақстан бойынша шетелдік көлікті жеңілдетілген тәртіппен рәсімдеуге электрондық үкімет порталына 9 мыңға жуық өтінім түсті.

23 қаңтарда сағат 15.00-ге дейін eGov.kz порталы арқылы шетелдік автокөліктерді тіркеу бойынша 9 мыңға жуық өтінім берілді. Оның 599-ы мақұлданды және 697 өтінім өңдеу сатысында, - деп жазылған «Ұлттық ақпараттық технологиялар» АҚ таратқан хабарламада.

Айта кетейік, бүгін елімізде шетелдік көліктерді заңдастыру басталды.

Қандай автокөліктерді заңдастыруға болады?

Қазақстан азаматтары сырттан әкелген шетелдік есептегі жеңіл автокөліктер, шағын, орта сыйымдылықтағы автобустар, шағын жүк көліктер, басқаруы оң жақтағы автокөліктер

Заңдастыру үшін талап етілетін ережелер:

Автокөлік Қазақстанға 2022 жылдың 1 қыркүйегіне дейін әкелінген болуы керек;

Криминалдық есепте болмауы керек;

Басқа мемлекетте бұрынғы тіркелген жері бойынша есептен шығарылуы тиіс;

Еуразиялық экономикалық одаққа кірмейтін елдерден әкелінген автокөлік кедендік тазартудан өтуі қажет.

Өтінім беру 2023 жылдың 1 шілдесіне дейін жалғасады.

Өтінім беру жолдары:

е-gov.kz электронды үкімет порталы арқылы;

Екінші деңгейлі банктердің қосымшалары арқылы;

ХҚКО-ның «Өз-өзіне қызмет көрсету секторы» арқылы.

Автокөлікті заңдастыру үшін қажетті құжаттар:

Өтінім;

Өтінім берушінің жеке басын куәландыратын құжат;

Көлік құралының паспорты немесе тіркеу туралы куәлік;

Көлік құралына меншік құқығын растайтын құжат.

Нәтижесі арнайы базаға тіркеледі және көлік иесінің телефонына 1414 нөмірінен SMS жіберіледі. Онда қабылданған шешім нақты жазылады. Заңдастыруға рұқсат етілсе, мемлекеттік алымдар төлеу қажет.

Алғашқы тіркеу үшін – 200 000 теңге;

Техпаспорт үшін мемлекеттік БАЖ – 4 313 теңге;

Мемлекеттік нөмір – 9 660 теңге.

Содан соң көлік иесі шетелдік техпаспорт, меншік құқығын растайтын құжатты ХҚКО мамандарына тапсырады. Тіркеу бекітілгеннен кейін автокөлік иесіне Қазақстанның тіркеу құжаты, мемлекеттік нөмір беріледі.