ШҚО-да көпбалалы отбасылар үшін 204 жеке тұрғын үй салынады

Бүгінгі таңда жеке инвесторлар есебінен сатып алу құқығымен жалпы ауданы 18,7 мың шаршы метр болатын 199 пәтерлік 110 үйдің құрылысы аяқталды. Шығыс Қазақстан облысында көпбалалы жанұялар үшін ағымдағы жылы жалпы ауданы 38,4 мың м2 болатын 404 пәтерлік 217 бір қабатты үйдің құрылысы басталған болатын. Қазіргі уақытта 110 үйде жұмыс аяқталды. Жыл соңына дейін қосымша 94 үй салынады, қалған 13-тің құрылысы 2021 жылы аяқталады деп жоспарланған.

“Басқа аудандар Аягөз ауданынан үлгі алуы тиіс. Аудан әкімі қызметіне кірісе сала, дереу 50 үйдің құрылысын бастады. Бұған дейін мұндай жұмыс жүрген емес ауданда. Бұл өте қуантарлық жайт. Жалпы, көпбалалы отбасыларға арналған үйлер жарық әрі жайлы болуы тиіс”, - деді облыс әкімі Даниал Ахметов.

Аймақ басшысының тапсырмасына сәйкес, 110,6 мың шаршы метрлік 1135 пәтерлік 665 бір қабатты үйдің құрылысы басталады. Жалпы, биыл қаржыландырудың барлық көздері есебінен тұрғын үйді пайдалануға беру бойынша жоспарлы көрсеткіш 117% өсіммен 519,3 мың м2 құрайды. Келесі жылы көпбалалы және басқа да санаттағы азаматтар үшін тұрғын үймен қамтамасыз ету бойынша жұмыс көлемі үш есе ұлғаяды деп күтілуде.