USD
«Назарбаев Зияткерлік мектептері» ДББҰ басқарма төрағасы Әнуар Жанғозин Алматыдағы жағдайға қатысты мәлімдеме жасады.
Оның сөзінше, оқушымен, ата-аналармен және педагогикалық ұжыммен кездесу өткен. Талқылауға сондай-ақ Оқу-ағарту министрлігінің өкілдері, өңірлік бала құқықтары жөніндегі уәкіл мен қоғамдық кеңестің мүшелері қатысты.
Кездесу барысында бұған дейін қабылданған шешім қайта қаралып, тараптар өзара түсіністікке келді. Назарбаев Зияткерлік мектебі өз шешімін өзгертпейді, оқушы мектептен шығарылып, мемлекеттік жалпы білім беретін мектепке ауыстырылды. Оқушының ата-анасы тарапынан ешқандай қарсылық жоқ.
Назарбаев Зияткерлік мектептері шәкірттерге әрдайым құрметпен қарап, қолдау көрсетуді және өзара сыйластыққа негізделген сындарлы қарым-қатынасты басты қағида ретінде ұстанады. Дегенмен, мұғалімдерге құрметпен қарау – мектеп үшін өзгермейтін және қатаң сақталатын талап, – деді ол.
Ол қоғамның бұл мәселеге бейжай қарамай, белсенділік танытқанына да алғыс білдіріп, кері байланысты және ашық диалогты жоғары бағалайтынын еске салды.
Оқу-ағарту министріне, министрлік өкілдеріне және бала құқықтары жөніндегі уәкілдерге аталған жағдайға жіті көңіл бөліп, қолдау көрсеткендері үшін ризашылығымды білдіремін, – деп жазды ол.
Айта кетейік, аталған білім ордасының 11-сынып оқушысы мұғалімді балағаттағаны үшін оқу жылының соңында мектептен шығарылған. Бұл жайт қоғамда қызу талқыланып, депутаттарға дейін пікір білдірді.
