Автокөліктегі құпия орыннан есірткі табылды

Көкшетау полицейлері автокөліктің салонынан есірткі затының 23 бумасын тәркіледі.

Polisia.kz-тің хабарлауынша, Көкшетау қаласы полиция басқармасының патрульдік полиция батальонының қызметкерлері түнгі рейдте Абай-Темірбеков көшелерінің қиылысында Chevrolet автокөлігін тоқтатып, күдік тудырған жүргізушінің көлігіндегі жасырын орыннан ірі көлемдегі есірткіні тапқан.

Тәртіп сақшыларының айтуынша, көлікті 28 жастағы ер адам жүргізген. Одан басқа көлікте 28 жастағы жолаушы болған. Құжаттарды тексеру кезінде жүргізуші мен жолаушы күдік туғызып, кқлікті тексеруге қарсы шыққан. Соған қарамай полицейлер көлікті тінтіп, ақ түсті консистенциясы тұзға ұқсас, өзіне тән иісі бар 23 полиэтилен пакет тәркіленді.

Қазір ҚР ҚК-нің 296-бабының 2-бөлігі бойынша (Өткізу мақсатынсыз есірткі құралдарымен, психотроптық заттармен, олардың аналогтарымен заңсыз жұмыс істеу) бойынша сотқа дейінгі тергеп-тексерулердің бірыңғай тізілімінде тіркелген. Тергеу жалғасып жатыр.