Елордада Рим Папасы діни рәсім өткізеді

Әлемдік және дәстүрлі діндер көшбасшыларының VII съезі аясында Рим Папасы Франциск ЭКСПО алаңында діни месса өткізеді.

Католиктік ғибадат рәсіміне негізінен Орталық Азиядан келген 3 мың қажы қатысады.

Қатысқысы келген адамдар мессаға арнайы билет арқылы кіріп жатыр.  Билеттер тегін таратылды.

Рим Папасы Францисктің Қазақстанға сапары оның шетелге жасаған 38-ші апостолдық сапары. Ол 2001 жылы Қазақстанға алғаш рет папалық сапармен келген Әулие Иоанн Павел II-нің ізін жалғастырушы.

Айта кетейік, Франциск - 266-шы Рим Папасы. Ол 2013 жылдың 13 наурызында сайланды. Ол 1200 жылдан астам уақыттағы бірінші еуропалық емес понтифик ретінде белгілі. Бірінші иезуит папасы Аргентинада дүниеге келген.