БҰҰ Бас Ассамблеясының төрағасы Қазақстанға келеді

11-12 тамызда БҰҰ Бас Ассамблеясының 76-шы сессиясының төрағасы Абдулла Шахид Қазақстанға ресми сапармен келеді.
Сапар барысында ол ел президенті Қасым-Жомарт Тоқаевпен, сыртқы істер министрлігінің басшылығымен, парламент сенатымен, үкіметтік емес ұйымдардың өкілдерімен, жастармен, академиялық қауымдастықпен және БҰҰ-ның елдегі тобымен кездеседі.

Биыл Қазақстанның БҰҰ-ға мүше болғанына 30 жыл толады. Абдулла Шахид Мальдив Республикасының үкіметі мен заң шығарушы органдарында ұзақ уақыт жұмыс істеген тәжірибелі дипломат ретінде кеңінен танымал. Гендерлік теңдіктің жақтаушысы ретінде ол өз елінің дипломатиялық өкілдіктерінің басшылары, сондай-ақ оның дипломатиялық қызмет қызметкерлерінің арасында алғаш рет гендерлік теңдікке қол жеткізгенімен белгілі.

Әлі де жалғасып жатқан COVID 19 пандемиясының аясында Абдулла Шахид халықаралық аренада алғашқылардың бірі болып сөйлеп, денсаулық сақтау саласындағы жаһандық дағдарыстың шағын аралдық дамушы мемлекеттердің экономикасы мен қоғамына жойқын әсерін атап өтті.
Абдулла Шахид өзінің кәсіби қызметін 1983 жылы дипломатиялық қызметкер ретінде бастады. Ол 1987 жылдан 1994 жылға дейін Бас Ассамблеяның барлық сессиясына қатысып, шағын мемлекеттердің қауіпсіздігін БҰҰ күн тәртібіне шығару үшін аянбай еңбек етті.

1995 жылы ол президент әкімшілігінде президенттің атқарушы хатшысы болып тағайындалды. 2005 жылы Абдулла Шахид мемлекеттік сыртқы істер министрі болып тағайындалды, ал 2007 жылы ол алғаш рет сыртқы істер министрі болды.

1994 жылдан 2018 жылға дейін ол бес мерзім қатарынан парламент мүшесі болды.
2008 жылы жаңа демократиялық Конституция қабылданғаннан кейін және 2009 жылы бірінші көппартиялы парламенттік сайлау өткеннен кейін төртінші рет парламент депутаты болып сайланған Абдулла Шахид Мальдив Республикасы Халық мәжілісінің демократиялық жолмен сайланған тұңғыш спикері атанды.