USD
Қаржылық мониторинг агенттігі Абай облысында прокуратураның үйлестіруімен «Агробизнес» жобасы аясында бөлінген бюджет қаражатын жымқыру ісін тергеуді аяқтады.
Аталған жоба фермерлік шаруашылықтарды қолдауға бағытталып, мал шаруашылығын және агробизнесті дамыту үшін жеңілдетілген несиелер беруді көздейді.
Тергеу деректеріне сай, «Ықыбай» шаруа қожалығының басшысы жалған құжаттарды пайдаланып, ірі қара мал сатып алу үшін жалпы сомасы 250 млн теңгеден асатын екі несие алған. Алайда алынған қаражат мал шаруашылығын дамытуға емес, жеке мақсаттарға жұмсалған. Құжаттарда кепіл ретінде көрсетілген мүлік пен мал іс жүзінде сатып алынбаған.
Мемлекетке келтірілген залал 211 млн теңгені құрады. Тергеу барысында күдікті келтірілген залалды толық көлемде өтеді. Оған қатысты елден шықпау және тиісті мінез-құлық сақтау туралы бұлтартпау шарасы таңдалды.
Қылмыстық іс сотқа жолданды. Өзге мәліметтер ҚР Қылмыстық-процестік кодексінің201-бабына сәйкес жария етілмейді.
Айта кетсек, мұндай қылмыстар агробизнеске көрсетілетін мемлекеттікқолдауға деген сенімді әлсіретіп, адал кәсіпкерлердің ауыл шаруашылығын дамыту мүмкіндігін шектейді. Бұл өз кезегінде саланың тұрақтылығы мен жалпы экономикаға кері әсерін тигізеді.
