USD
Ел аумағында 22-26 қыркүйек аралығында «Дәрмек» жедел-алдын алу іс-шарасы өткізілді. Акция есірткі құралдарының, психотроптық заттардың, прекурсорлар мен уытты дәрілік заттардың заңды айналымын бақылауға бағытталды.
Операция барысында:
- ҚК 303-бабы бойынша медицина қызметкерлеріне қатысты 11 қылмыстық іс қозғалды;
- 278 әкімшілік құқықбұзушылық анықталды;
- заңсыз айналымнан 7 мыңға жуық дәрілік зат және 80 тонна уытты тауар тәркіленді.
Медициналық мекемелердегі заң бұзушылықтар
Республика бойынша барлығы 519 медициналық мекеме тексерілді. Нәтижесінде:
- 190-нан астам әкімшілік құқықбұзушылық тіркелді;
- 202 медицина қызметкеріне қатысты материалдар жиналды;
- заңсыз айналымнан 40 мыңдай құрамында есірткі бар таблетка, 290 мың психотроптық таблетка, 236 мың ампула тәркіленді.
Өнеркәсіп пен логистикадағы тексерулер
- Өнеркәсіп саласында 60 құқықбұзушылық анықталып, 2 мың тонна прекурсордың айналымына шектеу қойылды;
- 20 заңды тұлға жауапкершілікке тартылды;
- 159 кәсіпорын мен 734 көлік құралы тексерілді.
Ақтөбе облысында Қытайдан теміржол арқылы 80 тонна уытты зат лицензиясыз әкелінгені анықталды. Тәркіленген заттардың жалпы құны – 86 млн теңге.
Өңірлерде анықталған заң бұзушылықтар
- ШҚО: бір ЖШС-де «Прегабалин», «Зоника», «Алиса» сияқты дәрілердің 35 мыңнан астам таблеткасы рецептісіз сатылған;
- БҚО: 40 жастағы тұрғынның үйінен психотроптық препараттарды лицензиясыз сату фактісі анықталды;
- Қарағанды облысы: Астана-Қарағанды бағыты бойынша қозғалған автокөліктен құны 240 мың теңгеден асатын 82 қаптама дәрі тәркіленді («Тропикамид», «Прегабалин», «Медазепам»).
ІІМ ескертуі
Ішкі істер министрлігі заңсыз айналымға қарсы қатаң бақылау жүргізіліп жатқанын атап өтті. Есірткі, психотроптық заттар, прекурсорлар мен уытты дәрілерге қатысты заңбұзушылықтар үшін әкімшілік және қылмыстық жауапкершілік қарастырылған.
Бұл шаралар азаматтардың қауіпсіздігін қорғауға және «Заң мен Тәртіп» қағидатын нығайтуға бағытталған.
