USD
Қостанай облысында Киберқылмысқа қарсы іс-қимыл басқармасының қызметкерлері Жітіқара қаласының 15 жастағы үш жасөспірімін анықтады. Олар өздерінің WhatsApp аккаунттарын телефон алаяқтарына сатқан. Бұл туралы басқарма бастығының міндетін атқарушы Олжас Мағыпаров мәлім етті.
Жасөспірімдердің аккаунттарын пайдалана отырып, алаяқтар Қостанай қаласының екі тұрғынын 11 миллион 950 мың теңгеге алдаған.
Жәбірленушілерге телефон шалып, әртүрлі операциялар сылтауымен SMS арқылы келген кодты айтуын сұраған. Яғни, классикалық схема бойынша: «Сізге код жіберілді, оны айтып жіберіңізші». Деректерге қол жеткізген соң, алаяқтар ақшаны шешіп алған.
Қазіргі уақытта тергеу жүргізілуде, оның нәтижесінде жасөспірімдердің іс-әрекетіне құқықтық баға беріледі. Сондай-ақ олардың ата-аналарын жауапкершілікке тарту мәселесі қаралады.
Полиция ескертеді: алаяқтар жиі әртүрлі айла-тәсілдерді қолданады, оның ішінде мессенджерлер мен әлеуметтік желілерде жалған аккаунттар жасап, жәбірленушілердің сеніміне кіріп, ақшасын иемдену бар.
Құқық қорғау органдары ата-аналарға балалардың интернеттегі іс-әрекетіне көбірек көңіл бөлуге, оларға мұндай «табыс табудың» қауіптері мен мүмкін салдарын түсіндіруге қатаң түрде кеңес береді.
