ҚМА құмар ойын ұйымдастырушылармен күресті күшейтеді

Қаржылық мониторинг агенттігі заңсыз ойын бизнесін ұйымдастырушыларға қатысты мыңға жуық істі тергеуді аяқтады.

2019 жылдан бастап заңсыз ойын бизнесін ұйымдастыру фактілері бойынша өндірісте 1 148 іс болды, оның ішінде 849 адамға қатысты 940 іс аяқталды.

Қабылданған алдын алу шараларының нәтижесінде соңғы 5 жылда тіркелген істер санының 5,5 есеге төмендеуі байқалады.

Жыл сайын анықталатын заңсыз ойын терминалдарының саны 16 есе, яғни 1 260-тан 76-ға дейін азайды. Бұл ретте заңсыз ойын терминалдары бойынша қылмыстық істердің саны 2019 жылғы 208-ден биыл 28-ге дейін, яғни 7 есе азайған.

Сондай-ақ үй-жайларды жалға берушілерді жауапкершілікке тарту бойынша шаралар қабылданып жатыр.

Астыртын казино қызметін тоқтатуға бағытталған жұмыс шеңберінде анықталған құқықбұзушылықтар санын 2019 жылғы 35-тен биыл 12-ге дейін немесе 3 есе азайтуға мүмкіндік туды.

Заңды букмекерлік кеңселер атын жамылған, заңсыз ойын сайттарының 4 фактісі (2022 жылы 2 дерек, биыл 2 дерек) анықталды. Алаяқтар белгілі букмекерлік кеңселердің атауларын (домендерін) қосымша аббревиатуралар қосу арқылы өзгерткен. Белгілі букмекерлік кеңсенің атымен заңсыз ойын бизнесін ұйымдастыру фактісі бойынша тергеу басталды, - деп жазылған хабарламада.

Биыл TikTok желісінде құмар ойындардың онлайн трансляциясы жанданды. Қатысушылардың басым бөлігі – кәмелетке толмағандар.

Қабылданған шаралардың нәтижесінде ұйымдастырушылардың 177 аккаунты анықталды. Ойынға күн сайын мыңдаған адамның қатысқаны белгілі болды.

10 ұйымдастырушыға қатысты 5 қылмыстық іс қозғалды, оның үшеуі бойынша үкімдер шықты (қалған істердің тергеуі жалғасып жатыр). 4 адам төрт жылға бас бостандығынан айырылды, 2 адамның бас бостандығы шектелді (1,5 жылдан), - деп жазылған хабарламада.

Құмар ойындарды тарататын жаңа аккаунттар қысқа мерзімде автоматты түрде бұғатталады.

Алдын алу шаралары шеңберінде агенттік IT-құралдарды пайдаланып, интернетте (жаңалықтар порталдары, блогтар, сайттар және әлеуметтік желілердің аккаунттары) құқыққа қайшы мазмұнды ақпаратты іздеуді жалғастырады

2022 жылы 5,5 мың онлайн казино сайттары мен аккаунттары, биыл 2 мыңнан аса сайт бұғатталды.

Агенттік Ақпарат комитетімен (АҚДМ) және ҰҚК МТҚ-мен бірлесіп, онлайн-казиноның «көшірме» сайттарын (жаңадан ашылатын) жедел бұғаттау туралы шешім қабылдады, «Кибербақылау» жүйесіндегі сайттарды бұғаттау алгоритмі 14 тәуліктен бір күнге дейін жеңілдетілді.

Агенттік қазақстандықтарды құмар ойындарға – лудоманияға патологиялық тәуелділіктен қорғау үшін заңсыз ойын нүктелерін анықтау және бұғаттау жөніндегі жұмысты жалғастырады.