Қазақстан мен Қытай сауда-саттықта ауқымды жобаны қолға алды

Сауда және интеграция министрі Арман Шаққалиев бастаған делегация Қытайдың Цзянсу провинциясының Нанкин қаласына барып, «Цзянсу – Орталық Азия» сауда орталығы алаңында болды.

Ауқымды жоба SOHO Holdings Group компаниясымен бірігіп іске асырылуда.

Биыл наурыз айында Қазақстан мен Қытай «Орталық Азия – Цзянсу» көпфункционалды орталығын құру туралы келісімге келген еді. Экспортты қолдау бойынша QazTrade ұлттық операторы мен Jiangsu SOHO HoldingsGroup Co Ltd халықаралық компаниялар тобы тиісті құжатқа қол қойды.

Тараптар Қытайдың Цзянсу провинциясында сауда орталығын салу жобасын іске асыруға келісті. Сауда алаңында қазақстандық өнімдер, ал болашақта Орталық Азия елдерінің тауарлары сатылымға шығарылады.

Цзянсуға сапары кезінде Арман Шаққалиев компания өкілдерімен бірқатар кездесулер өткізіп, Қазақстан мен Орталық Азия елдері үшін салынған сауда павильонын аралады.

SOHO HoldingsGroup өкілінің айтуынша, жоба бойынша Нанкин қаласының дамыған ауданында 11 ғимарат салу жоспары бар. Бұл нысандардың барлығы бизнестің жаңа түрлерін, соның ішінде трансшекаралық нысандарды орналастыруға арналған. Қазақстандық және Орталық Азия мемлекеттерінің өнім өндірушілер үшін төрт қабатты бөлек павильон қарастырылған.

Қытай – біздің стратегиялық сауда серіктесіміз. Қазақстанмен екіжақты сауда айналымында жетекші орын алады. Мемлекет басшысы Қытаймен өзара сауданы 100 млрд долларға жеткізу міндетін қойды. «Орталық Азия – Цзянсу» жобасын іске асыру қазақстандық өндірушілердің Қытай нарығына шығуына ықпал етіп, екі ел арасындағы сауда-экономикалық қарым-қатынастың кеңеюіне серпін береді, – деді сауда және интеграция министрі Арман Шаққалиев. 

Сондай-ақ, Шаққалиев сауда павильонының аумағы 2 мың шаршы метр болатынын, оның басым бөлігі қазақстандық тауарлар көрмесіне бөлінетінін атап өтті.

Жобаны әзірлеушілердің айтуынша, сауда кешенінің бірінші қабатында қытайлықтар үшін Қазақстанның мәдениеті мен ерекшеліктері туралы таныстыру алаңы орналасады. Екінші қабатта әртүрлі санаттағы отандық тауарларды көрсету ұсынылады. Оның ішінде ауыл шаруашылығы өнімдері, өнеркәсіп тауарлары және басқа да өнімдер бар. Қалған қабаттарда қазақстандық компаниялардың кеңселері орналасады.

Біз қазақстандық бизнесті отандық тауарлардың экспорттық әлеуетін көрсету үшін Орталық Азия – Цзянсу алаңында өз өнімдерін белсенді түрде көрсетуге шақырамыз. Бұл ретте Қытай тарапы QazTrade компаниясына қазақстандық өнімді квота бойынша орналастыруға айрықша құқық береді, – деді Арман Шаққалиев өндірушілерге.

Қытайлық серіктестердің айтуынша, Нанкиндегі Орталық Азия – Цзянсу сауда орталығының ресми ашылуы қыркүйек айына жоспарланған. Осыған орай Сауда және интеграция министрі Арман Шаққалиев қазақстандық тауар үлгілерін Қытайдың Цзянсу провинциясына жөнелту үшін жедел дайындықты бастауды атап өтті.

Қазақстанның іскер топтарының қатысуымен өткен кездесуде Jiangsu SOHO HoldingsGroup Co. Ltd компаниясының президенті команияның даму жолы жайында айтып берді. Сондай-ақ бірлескен жобаны жүзеге асыру аясында ынтымақтастықты кеңейту перспективаларын белгіледі. Цзянсу провинциясындағы ең ірі кәсіпорын «Белдеу және жол» бастамасына қызмет етеді.

Компания алты бағыт бойынша дамып келеді.Олардың бірі өндіріс пен жеткізу тізбегінің қауіпсіздігін қамтамасыз етеді, сондай-ақ ауқымды сауда алаңын құруда тәжірибесі мол. Халықаралық топтың басым бағыттарының қатарында сауда логистикасын дамытуды көздеп отыр.

Нанкиндегі қазақстандық павильонмен қатар Қазақстанда да осындай көпфункционалды орталық құру жоспарлануда. Кешенді алаң қытайлық және қазақстандық тауарлардың витринасының рөлін атқарып қана қоймайды, сонымен қатар мұнда бизнес өкілдері халықаралық серіктестермен келісім-шартқа отыра алады, іскерлік келіссөздер жүргізеді, қаржылық және кеңес беру қызметтерін ала алады, сауда операцияларын рәсімдеуге мүмкін болады.

Ірі сауда орталықтарын құру Қытай-Еуропа бағыты бойынша батыс бағытта қойма инфрақұрылымын салумен қатар жүреді. QazTrade АҚ бас директоры Жеңіс Өсербай қытайлық серіктестерге Қазақстанда шетелдік қоймалар салу үшін «Қорғастың» мүмкіндіктерін пайдалануды ұсынды.

Біз SOHO HoldingsGroup-тың аймақтардағы құрылыс жоспарларын, әсіресе Қазақстандағы бастамасын қолдаймыз. Осы жерге ұшпас бұрын біз Қорғаста болып, екі арнайы экономикалық аймақтың әкімшілігімен келіскен болатынбыз. Логистикалық қоймаларды дамыту үшін қажетті аумақ бар. Біз үлкен әлеует пен мүмкіндіктерді көріп отырғандықтан, жобаны жүзеге асыруға бар күш-жігерімізді саламыз, – деді QazTrade басшысы.

Сондай-ақ, ол Нанкин қаласында ашылатын қазақстандық павильонды толтыру үшін жүргізіліп жатқан жұмыстар жайында, Орталық Азия елдерінің серіктестерінің Цзянсудағы көпфункционалды орталықты дамытуға қатысуға қызығушылықтары туралы баяндады.

Айта кету керек, Қазақстан бизнеске жан-жақты қызмет көрсету алаңына айналатын және сауда-экономикалық байланыстарды кеңейтуге серпін беретін, Орталық Азия елдері арасындағы мәдени алмасуды күшейтетін «Орталық Азия – Цзянсу» кешенді алаңының жұмысын үйлестіретін болады.