USD
Қазақстанда жалған мемлекеттік көлік нөмірлерін дайындап, сатумен айналысқан заңсыз желі анықталды. Схеманы ұйымдастырған адам ұсталып, тергеу басталды.
Бас көлік прокуратурасының үйлестіруімен Көліктегі полиция департаменті жалған мемлекеттік тіркеу нөмірлік белгілерін (МТНБ) әзірлеу және тарату фактісін анықтады.
Тергеу нұсқасына сәйкес, Алматы қаласында ұзақ уақыт бойы жалған автонөмірлерді жасап, тапсырыс бойынша өткізумен айналысқан тұлға қолға түскен. Анықталған мәліметтер бойынша, жалған нөмірлер Ресейден экспресс-жеткізу арқылы әкелініп, кейін Қазақстанның әртүрлі аймақтарындағы тапсырыс берушілерге жөнелтіліп отырған.
Жедел іс-шаралар кезінде құқық қорғау органдары жалған мемлекеттік тіркеу белгісін және іске қатысты басқа да заттай дәлелдемелерді тәркіледі. Қазір заңсыз әрекетке қатысы болуы мүмкін өзге тұлғаларды анықтау бойынша тергеу жалғасып жатыр.
Бас көлік прокуратурасы жалған мемлекеттік нөмірлерді пайдалану заң алдында жауапкершілікке әкелетінін ескертті. Мұндай әрекеттер көлік қозғалысы қауіпсіздігіне қауіп төндіріп, құқық бұзушылық болып саналады.
Қылмыстық-процестік кодекстің талаптарына сәйкес, тергеу барысы туралы қосымша ақпарат әзірге жарияланбайды.
