Әскерден келген сарбазға 2 ай несие каникулы беріледі

Қазақстанда әскери борышын өтеп келген сарбазға кредитін 60 күннен кейін төлеуге мүмкіндік берілмек. Бұл туралы Сенат депутаты Сергей Карплюк айтты.

Сенат депутаты Сергей Карплюк заңға енгізілген негізгі нормаларды түсіндірді. Сондай-ақ құжатта сарбаздардың құқығын қорғайтын нормалар енгізілгенін атап өтті.

«Біз қолданыстағы заң жобаларын жақсартатын түзетулерді ұсындық. Заңға мерзімді қызметтегі әскери қызметшілер үшін 60 күнді енгіздік. Оған сәйкес банктер, микроқаржы ұйымдары оларға (несиені төлесін деп – авт.) талап қоймауы керек. Сарбаздың кредиттері бар дейік. Конституцияға сәйкес, ол Отан алдындағы борышын өтеп үйіне келді. Банк ұйымдары (несиені төлесін деп бірден талап қоймауы үшін) біз белгілі уақыт керек деп шештік. Үкімет қорытындысын берді. Осылайша, әскери қызметшілерге 60 күн берілді. Әскери борышын өтеген жастар 60 күнде жұмысқа орналасып, төлем қабілетін ретке келтіре алаы», - деді Сергей Карплюк Сенаттың жалпы отырысынан соң.

Еске салайық, Сенат депутаты Сергей Карплюк алдағы уақытта жеке тұлғаның қаржы ұйымдарынан алатын несиесінің көлемі 3,7 млн теңгеден асатын болса, ол жұбайының рұқсатын алуға міндеттелетінін айтқан еді.