USD
Қарағандыда зейнеткер 3 миллион теңгесін алаяқтарға бере жаздады
Қарағанды облысында 68 жастағы әйел телефон алаяқтарының арбауына түсіп, депозитіндегі 3 миллион теңгені жоғалтуға шақ қалды. Ол ақшасын қолма-қол шешіп алып, оны Алматыға жеткізу үшін такси жалдаған. Алайда жүргізушінің күмәндануының арқасында зейнеткердің қаражаты сақталып қалды.
Полицияның мәліметінше, оқиға Жаңа Майқұдық ауылының тұрғынымен болған. Бәрі телефон қоңырауынан басталған. Белгісіз адамдар әйелге бұрынғы әріптестері ретінде хабарласып, банк шоттарын шұғыл тексеру керектігін айтқан. Осылайша олар зейнеткерді алаңдатып, асығыс шешім қабылдауға итермелеген.
Кейін WhatsApp арқылы өзін банк қауіпсіздік қызметінің қызметкері ретінде таныстырған «Марат» есімді адам байланысқа шыққан. Ол әйелге ақшасын қорғауға көмектесетінін айтып, сеніміне кірген.
Алаяқтар зейнеткердің депозитінде 3 миллион теңге бар екенін білген соң, барлық қаражатын қолма-қол шешіп алуды тапсырған. Әйел олардың айтқанын орындап, ақшаны банктен алған.
Осыдан кейін оған қаражатты қалааралық таксимен Алматыға жеткізу керектігі айтылған. Зейнеткер сауда үйіне қарай бет алып, жолға шығуға дайындалған. Алайда такси жүргізушісі жолаушысының әрекетінен күмәнданып, полицияға хабар берген. Ол тәртіп сақшыларына жағдайды түсіндіріп, әйелдің қайда бара жатқанын жеткізген.
Оқиға орнына жеткен криминалдық полиция қызметкерлері алаяқтықтың алдын алды. Нәтижесінде 3 миллион теңге зейнеткердің өзінде қалды.
Полиция тұрғындарға ескерту жасады
Құқық қорғау органдары азаматтарды телефон арқылы өзін банк қызметкері немесе мемлекеттік орган өкілі ретінде таныстыратын бейтаныс адамдарға сенбеуге шақырады.
Полицияның ескертуінше, банк қызметкерлері мен мемлекеттік мекемелердің өкілдері мессенджер арқылы ақша шешіп алуды, басқа шотқа аударуды немесе үшінші тұлғаға беруді талап етпейді.
Егер күмәнді қоңырау түссе, әңгімені бірден тоқтатып, болған жағдай туралы 102 нөміріне хабарлау қажет. Сондай-ақ жақындарыңызға, әсіресе егде жастағы туыстарыңызға интернет пен телефон арқылы жасалатын алаяқтықтың кең тараған тәсілдерін түсіндіріп отырған жөн.
