USD
Жамбыл облысында балық аулауға барған жасөспірім көлге құлап, су ортасындағы тасқа жабысып қалған. Өздігінен жағаға шыға алмаған баланы екі полиция қызметкері құтқарып, аман алып қалды.
Полицияның хабарлауынша, оқиға туралы ақпарат «102» арнасына түскен. Оқиға орнына жедел жеткен патрульдік полиция қызметкерлері Маханбет Шаянбаев пен Қасымхан Қалаубек бірден көмекке кіріскен. Олар ойланбастан суға түсіп, жасөспірімді қауіпсіз жерге алып шықты.
Құтқарылған бала кейін жедел жәрдем мамандарына тапсырылды. Полицияның баспасөз қызметінің мәліметінше, қазіргі уақытта жасөспірімнің жағдайы жақсы. Оның ата-анасы полицейлерге батылдық танытып, жедел әрекет еткені үшін ризашылығын білдірген.
Айта кетейік, бұған дейін Абай облысының Үржар ауданында жоғалып кеткен жеті жастағы баланың табылғаны хабарланған еді. Бала елді мекеннен бірнеше шақырым қашықтықтағы ауыл шаруашылығы алқабынан анықталған.
