USD
Қазақстанда өзін-өзі жұмыспен қамтыған азаматтарды қоса алғанда, кәсіпкерлікпен айналысатындардың жалпы саны 3,2 миллион адамға жетті. Бұл өткен жылдың сәйкес кезеңімен салыстырғанда 32,5%-ға жоғары. Бұл туралы Үкімет отырысында Ұлттық экономика министрі Серік Жұманғарин мәлімдеді.
Министрдің дерегінше, биылғы жылдың алғашқы тоғыз айында елімізде 277 мың жаңа кәсіпкерлік субъектісі тіркелген. Олардың 34,7 мыңы заңды тұлға болса, 242,3 мыңы жеке кәсіпкер ретінде есепке алынған.
Сонымен бірге есепті кезеңде 19,7 мың заңды тұлға мен 356 мың жеке кәсіпкер тіркеуден шығарылған. Алайда бұл көрсеткіштердің барлығы кәсіпкерлік қызметтің толық тоқтағанын білдірмейді.
Серік Жұманғариннің айтуынша, есептен шығарылған жеке кәсіпкерлердің 42,6%-ы 2025 жылы табыс таппаған. Ал 20,8%-ы кәсіпкерлік қызметін жалғастыра отырып, өзін-өзі жұмыспен қамтығандарға арналған арнайы режимге ауысқан.
Бұдан бөлек, жалпыға бірдей белгіленген салық режимін қолданатын және қосылған құн салығын (ҚҚС) төлейтін кәсіпкерлер саны 28%-ға өскен.
Өзін-өзі жұмыспен қамтыған азаматтарға арналған режимді 981 мың адам таңдаған. Олардың 807 мыңы салық органдарында алғаш рет тіркелген.
Үкімет алдағы уақытта экономиканың өсу қарқынын арттыру үшін инфрақұрылымдық жобаларды жүзеге асыруға және өңдеу өнеркәсібіне инвестиция тартуға басымдық бермек. Сондай-ақ жоспарланған өндірістік жобаларды жыл соңына дейін іске қосу көзделіп отыр.
Бұл туралы Серік Жұманғарин Үкімет отырысында айтып, жаңа өндіріс орындарын іске қосу экономикалық белсенділікті арттыруға бағытталғанын атап өтті.
