Түркістан облысының тұрғыны алимент төлемегені үшін қамауға алынды

Түркістан облысының Отырар ауданында алимент төлемей жүрген азаматтың ісі қаралды. Аудандық сот Әкімшілік құқықбұзушылық туралы кодекстің 669-бабы 1-бөлігімен әкімшілік істі қарап, борышкерден алимент өндіріп алу туралы шешім шығарды.

Сот отырысында анықталғандай, борышкер сот шешімін орындамаған. Оның 2023 жылғы 31 наурызға дейінгі алимент берешегі 2 140 325 теңгеге жеткен.

Сотта құқық бұзушы өзінің кінәсін мойындап, тұрақты жұмыс болмағандықтан сот шешімін орындауға мүмкіндігі болмағанын, алдағы уақытта толық орындайтынын айтқан.

ӘҚБтК 669-бабының 1-бөлігіне сәйкес сот үкiмiн, сот шешiмiн немесе өзге де сот актiсi мен атқарушылық құжатты орындамаған адамға 5 айлық есептiк көрсеткiш мөлшерiнде айыппұл салынады немесе ол 5 тәулікке дейінгі мерзімге әкімшілік қамаққа алынады.

Сот қаулысымен борышкер ӘҚБтК 669-бабының 1-бөлігімен кінәлі деп танылып, 4 тәулікке әкімшілік қамаққа алынды.

Қаулы заңды күшіне енген жоқ.