Алматыда белгісіз қыздар тұрғын үйдің біріндегі пәтердің есігін бірнеше рет теуіп, тұтқасын сындырып кеткен. Оқиға кезінде үйде ешкім болмаған. Бұл туралы зардап шеккен тұрғын әлеуметтік желіде жазба жариялады.
Оның айтуынша, өзі сапарда жүрген уақытта белгісіз адамдар пәтерге келіп, есікті күшпен ашуға әрекет жасаған. Қыздар есікті аяқтарымен теуіп, жұлқылап, шайқаған. Соның салдарынан есіктің тұтқасы бүлінген.
Үй иесі көршілерден мән-жайды сұрастырғанымен, ешкім келген қыздарды тани алмаған. Алайда тұрғындардың айтуынша, олар сол уақытта подъезде шу шығарып, айналадағыларға кедергі келтірген.
Пәтер иесі болған жағдайға таңғалып, егер оқиға кезінде үйде біреу болғанда, жағдайдың әлдеқайда күрделі болуы мүмкін екенін атап өтті. Сондай-ақ ол қыздарды таныған адамдардан жеке хабарлама арқылы ақпарат беруді сұрады.
Жазбаға пікір қалдырған кейбір қолданушылар қыздардың бірін SNICKERS лақап атымен танымал блогерге ұқсатқан. Алайда бұл ақпарат әзірге ресми түрде расталған жоқ.
Әлеуметтік желі қолданушылары оқиғаға құқық қорғау органдары назар аударуы керектігін айтып жатыр.
Редакция осы жағдайға қатысты Алматы қалалық Полиция департаментіне ресми сауал жолдады. Құзырлы органның жауабы қосымша жарияланады.
USD