USD
Астана халықаралық әуежайында жолаушыларды жасанды интеллект көмегімен биометриялық сәйкестендіру жүйесін енгізу ұсынылды. Жаңа технология ұшу алдындағы тексеру рәсімдерін жеделдетіп, қауіпсіздік деңгейін арттыруға бағытталған.
Тиісті жоба «Ашық НҚА» порталында жарияланып, 4 қарашаға дейін қоғамдық талқылауға шығарылды.
Құжатта биометриялық аутентификацияны қолдану жолаушыларға қызмет көрсету сапасын жақсартуға мүмкіндік беретіні көрсетілген. Атап айтқанда, азаматтарды бет-әлпеті арқылы сәйкестендіру тексеру уақытын қысқартып, әуежайдағы рәсімдерден жылдам өтуге жағдай жасауы мүмкін.
Сонымен қатар, бастама әуежайдағы қауіпсіздік шараларын күшейтуді көздейді.
Жоба авторларының мәліметінше, ұсыныстың әлеуметтік-экономикалық және құқықтық салдары болмайды.
Қазіргі уақытта бұл бастама қоғамдық талқылау кезеңінде. Биометриялық жүйені енгізу туралы түпкілікті шешім жобаны қарау нәтижесіне байланысты қабылданады.
