Шымкентте автобус жолақысын 100 теңгеге дейін көтеру жоспарланып отыр

Шымкент қаласында қоғамдық көлікте жүру ақысы 70 теңгеден 100 теңгеге дейін өсуі мүмкін. Қала билігі тарифті қайта қарау қажеттігін тасымалдау шығындарының артуымен түсіндіріп отыр.

Қала әкімі Ғабит Сыздықбековтің айтуынша, қазіргі уақытта жолақыдан түскен қаражат пен тасымалдаушылардың нақты шығындары арасындағы айырмашылық мемлекеттік субсидия есебінен өтеледі. Алайда шығындар көлемінің ұлғаюына байланысты қолданыстағы тарифті ұзақ уақыт сақтау қиынға соғуы мүмкін.

Сонымен қатар қала тұрғындары автобустардың шамадан тыс толып жүретініне жиі шағымданады. Әкімнің түсіндіруінше, жолаушыларды есепке алу жүйесі автобустағы адамдардың нақты санын әрдайым көрсете бермейді.

Мәселен, автобуста 100 жолаушы болғанымен, олардың тек 50-і жолақысын төлесе, жүйеде ақылы түрде өткен жолаушылар ғана есепке алынады. Соның салдарынан автобустың сыйымдылығы мен жолаушылар ағыны туралы мәліметтер нақты жағдайға сәйкес келмеуі мүмкін.

Жаңа тариф енгізілген жағдайда да бірқатар азаматтарға арналған жеңілдіктер сақталады. Атап айтқанда, зейнет жасындағы адамдар мен жастарға берілетін жеңілдіктер күшінде қалмақ. Ал мектеп оқушылары қоғамдық көлікте бұрынғыдай тегін қатынай алады.

Жолаушылар көлігі және автомобиль жолдары басқармасының мәліметінше, жолақының жаңа мөлшерін 2027 жылдың 1 қаңтарынан бастап енгізу жоспарланып отыр.