USD
Астанада полиция әлеуметтік желідегі тікелей эфир кезінде бейәдеп сөздер айтып, есірткі қолданған ер адамға қатысты шара қабылдады.
Полицияның мәліметінше, құқық қорғау органдары әлеуметтік желілерге жүргізілген мониторинг барысында құқыққа қайшы контент жарияланғанын анықтаған. Тексеру нәтижесінде эфирдегі адамның жеке басы анықталып, оның 36 жастағы Рустам Мухаметрахимов екені белгілі болған.
Полиция тікелей эфир кезінде ер адамның балағат сөздер қолданғанын хабарлады. Осы әрекетіне байланысты ол әкімшілік жауапкершілікке тартылып, сот шешімімен 10 тәулікке қамауға алынған.
Сонымен қатар жүргізілген тексеру барысында есірткі затын медициналық емес мақсатта қолдану фактісі расталған. Осыған байланысты ер адамға қатысты тиісті жауапкершілік шаралары қолданылды.
Полиция сондай-ақ есірткі заттарын өткізу мақсатынсыз заңсыз айналымға қатысты қылмыстық іс қозғалғанын мәлімдеді. Қазіргі уақытта іс бойынша қажетті тергеу әрекеттері жүргізіліп жатыр.
Ведомствоның хабарлауынша, күдіктінің әрекетіне түпкілікті құқықтық баға тергеу нәтижелері бойынша берілетін болады.
