USD
Қазақстанда көмірді терең өңдейтін алғашқы кешеннің құрылысы қолға алынды. Қарағанды облысына жұмыс сапарымен барған Мемлекет басшысы Қасым-Жомарт Тоқаев Qarmet металлургиялық комбинатындағы жаңа өндіріс нысандарының құрылысымен танысты.
Ақорда мәліметінше, президент №8 және №9 кокс батареяларының құрылыс барысын көрді. Жоба кәсіпорынның өндірістік қуатын арттырып, ескі технологиялық жабдықтарды жаңғыртуға бағытталған.
Жаңа екі батарея жылына 1,5 миллион тонна құрғақ кокс өндіруге қауқарлы болады. Әрқайсысында биіктігі 7,6 метр болатын 54 пеш орнатылады. Құрылысқа технологиялық серіктес ретінде Қытайдың ACRE Coking & Refractory Engineering Consulting Corporation компаниясы тартылған.
Жаңа өндіріс іске қосылған соң домна пештері қажетті кокспен тұрақты қамтамасыз етіліп, өнім сапасын жақсартуға және экологиялық қауіпсіздік талаптарын күшейтуге мүмкіндік туады. Сонымен қатар жаңа нысандар 1960-1970 жылдары пайдалануға берілген ескі өндіріс қуаттарының орнын басады. Оларды келесі жылы іске қосу жоспарланған.
Жобаның тағы бір маңызды бағыты – Қазақстанда кокстеу өнімдерін терең өңдейтін алғашқы көмір-химия кешенін қалыптастыру. Бұл елдегі металлургия мен көмір химиясы саласының дамуына жаңа мүмкіндік ашпақ.
