Қазақстанда үш айда интернет-алаяқтыққа қатысы бар 724 адам ұсталды

Қазақстанда 1 шілде мен 30 қыркүйек аралығында интернет-алаяқтыққа қатысы бар 724 адам қолға түсті. Олардың қатарында 22 шетел азаматы бар. Бұл туралы Ішкі істер министрлігі хабарлады.

Ведомствоның мәліметінше, аталған кезеңде интернет-алаяқтыққа қатысты 1595 қылмыс анықталған. Сонымен қатар бұрын тіркелген 917 қылмыстың беті ашылды.

ҚР ІІМ Киберқылмысқа қарсы іс-қимыл департаментінің бастығы, полиция полковнигі Жандос Сүйінбайдың айтуынша, ұсталғандардың 97-сі қамауға алынған. Бұдан бөлек, іздеуде жүрген сегіз адам қолға түсті. Есепті кезеңде 1242 қылмыстық іс аяқталған.

Интернеттегі алаяқтықпен күрес аясында құқық қорғау органдары күмәнді ресурстарды анықтау жұмыстарын да жалғастырып келеді.

Министрліктің дерегіне сәйкес, биылғы тоғыз айда қазақстандықтарға қауіп төндіретін 82 мыңға жуық интернет-ресурс анықталып, оларды бұғаттау үшін тиісті шаралар қабылданған.

Мамандар азаматтарды интернет арқылы жасалатын күмәнді ұсыныстарға сақ болуға, жеке деректер мен банк картасының мәліметтерін бөгде адамдарға бермеуге шақырады.