USD
Қазақстан президенті Қасым-Жомарт Тоқаев Бельгия королі Филипп пен патшайым Матильдамен шағын құрамда келіссөз өткізді. Кездесу барысында екі ел арасындағы ынтымақтастықты дамыту және екіжақты серіктестікті нығайту мәселелері сөз болды. Бұл туралы Ақорда хабарлады.
Мемлекет басшысы Бельгия королі мен патшайымының Қазақстанға жасаған алғашқы мемлекеттік сапарының маңызына тоқталды. Оның айтуынша, бұл сапар екі ел арасындағы қарым-қатынасты жаңа деңгейге көтеруге мүмкіндік береді.
Тоқаев Бельгия делегациясының құрамында үкімет пен өңірлік билік өкілдері, кәсіпкерлер, академиялық қауымдастық және бұқаралық ақпарат құралдарының өкілдері келгенін атап өтті. Сондай-ақ ол корольдің Қазақстанмен байланыстарды дамытуға деген ықыласын жоғары бағалайтынын жеткізді.
Президент Бельгияны Қазақстанның Еуропадағы сенімді серіктестерінің бірі ретінде атап, екі ел арасындағы қарым-қатынастар достық пен өзара құрметке негізделгенін айтты.
Қасым-Жомарт Тоқаевтың сөзінше, келесі жылы Қазақстан мен Бельгия арасындағы дипломатиялық қатынастардың орнағанына 35 жыл толады. Осы кезеңде тараптар саяси диалогты дамытып, түрлі бағыттар бойынша ынтымақтастықты нығайтып келеді.
Мемлекет басшысы Бельгияның жетістіктеріне тоқталып, елдің тәжірибесін зерделеудің маңызын атап өтті. Сонымен қатар ол бес жыл бұрын Бельгияға жасаған сапарын еске алып, биыл маусым айында премьер-министр Барт де Вевермен өткен кездесу туралы айтты.
Президенттің пікірінше, жоғары деңгейдегі тұрақты диалог екіжақты серіктестікті одан әрі нығайтуға негіз болады.
