Қазақстанда тағы бір сарбаз қайтыс болғаны туралы ақпарат тарады

Кеше кешке қарай (12 маусым күні) Павлодардағы 5512 әскери бөлімінде контрактпен қызмет атқарған Айбек Тұрсымбаев деген сарбаз мерт болды. Бұл туралы журналист Махамбет Әбжан Telegram каналында жазды, деп хабарлайды Taunews.kz. 

Махамбет Әбжанның хабарлауынша ақпаратты марқұмның туысы растады.

«Қайырлы күн! Кеше Павлодардағы 5512 әскери бөлімінде жұмыс істейтін 32 жастағы контрактник қайтыс болды. Бір қызығы ол отпускте жүрген. Демалып жатқан жерінен камазды жөндеуге шақырып алған. Камаздың дөңгелегін үрлеп жатқанда, дөңгелек жарылып кеткен» деп хабарлады аты-жөнін атамауды сұраған сарбаздың туысы», - делінген журналист Махамбет Әбжанның хабарламасында.

Қайтыс болған жігіттің соңында әйелі мен қызы қалды. Әйелінің екінші баласына аяғы ауыр (8 ай).

«Осындай заңсыз әрі қайғылы жағдай жабулы күйінде қалмаса екен», - деп өтінді хабарласқан адам.