USD
Астанада Есілдің құрғаған табанынан ноутбук пен микротолқынды пеш табылды
Астанада Есіл өзенінің суы тартылған бөлігінен түрлі тұрмыстық және электрондық құрылғылар табылды. Таңертең жағалауды аралаған балықшылар құрғап қалған аумақтан ноутбук пен микротолқынды пешке ұқсас техниканы байқаған.
Еске салайық, бұған дейін елордадағы Есіл өзенінің бір бөлігінде су деңгейі күрт төмендеп, жағалаудың кей тұстары құрғап қалғаны хабарланған еді. Әсіресе Кенесары көшесінің басынан Бейсеков көшесіне дейінгі аумақта өзгеріс анық байқалған. Су азайған тұста қалып қойған балықтарға шағалалар жиналған.
Астана әкімдігінің хабарлауынша, өзендегі су деңгейінің төмендеуіне реттеуші бөгеттің бесінші кезегін салу жұмыстары себеп болған. Құрылыс жұмыстары аяқталған, енді су деңгейін көтеру шаралары қолға алынбақ.
Қалада Есіл өзенінің экологиялық жағдайын жақсарту бағытындағы жұмыстар да жалғасып келеді. Мамандар өзен арнасындағы су өсімдіктерін тазалап, жағалаудағы қоқысты жинайды. Ресми дерекке сәйкес, 2026 жылдың басынан бері өзен жағасынан 50 тоннадан астам қоқыс шығарылған.
Ал 2027 жылы Есілді тазартуға арналған кешенді шараларды жалғастыру жоспарланып отыр.
Бұған дейін өзенге балық жіберу және кеме қатынайтын бөліктерді тереңдету жұмыстары жүргізілген. Сондай-ақ гидрологиялық зерттеулер нәтижесінде тазартуды қажет ететін учаскелер анықталып, алдағы жұмыстардың көлемі есептелген.
