USD
Тоқаев Қазақстан экономикасының өсімі мен негізгі жетістіктерін атады
Президент Қасым-Жомарт Тоқаев Республика күніне арналған салтанатты жиында Қазақстанның әлеуметтік-экономикалық даму көрсеткіштеріне тоқталып, соңғы жылдардағы нәтижелерді атап өтті.
Мемлекет басшысының айтуынша, 2019 жылдан бері ел экономикасы шамамен 30 пайызға өскен. Жан басына шаққандағы жалпы ішкі өнім көлемі 15 мың доллардан асқан. Ал «Ұлттық қор – балаларға» бағдарламасы аясында 7 миллион баланың есепшотына жалпы сомасы 2,5 миллиард доллар аударылған.
Президент тұрғын үй құрылысы саласындағы көрсеткіштерге де назар аударды. Оның сөзінше, өткен жылы елде 20 миллион шаршы метрден астам тұрғын үй пайдалануға берілген. Сонымен қатар қазақстандықтардың орташа өмір сүру ұзақтығы 76 жасқа жақындаған. Тоқаев Дүниежүзілік банктің деректеріне сүйене отырып, бұл көрсеткіш бойынша Қазақстан өңірде алдыңғы орында екенін айтты.
Мемлекет басшысы ұлттық экономиканы нығайту мен кәсіпкерлікті дамыту маңызды басымдықтардың бірі екенін жеткізді. Оның мәліметінше, Қазақстанның жалпы ішкі өнімі 350 миллиард долларға жуықтап, ел Тәуелсіз Мемлекеттер Достастығы елдері арасында екінші орынға шыққан.
Сондай-ақ шағын және орта бизнестің экономикадағы үлесі 40 пайызға жеткені айтылды. Президенттің пікірінше, отандық кәсіпкерлердің өндірісті кеңейтуі және жаңа іскерлік мәдениеттің қалыптасуы ел экономикасының дамуына ықпал етіп отыр. Қазір бұл салада еңбекке жарамды азаматтардың жартысына жуығы жұмыс істейді.
