USD
Таиландтан есірткі тасымалдаған екі адам сотталды: біріне 16 жыл жаза берілді
Астанада Таиландтан Қазақстанға есірткі жеткізуге қатысты екі қылмыстық іс бойынша сот үкімі шықты. Сотталғандардың бірі есірткіні чемоданмен ұшақ арқылы әкелсе, екіншісі пошта жөнелтілімімен жіберген.
Бас көлік прокуратурасының мәліметінше, 20 жастағы қыз ақшалай сыйақы үшін Таиландтан Қазақстанға 4,7 келі каннабис экстрактын жеткізген. Ол есірткіні екі чемоданға салып, кедендік бақылаудан тәттілер ретінде алып өтпек болған. Алайда заңсыз жүк Астана әуежайына келген кезде анықталып, тәркіленді. Сот қызды 16 жылға бас бостандығынан айырды.
Екінші іс бойынша 39 жастағы ер адамға үкім шығарылды. Тергеу деректеріне сәйкес, ол 2024 жылдың көктемінде Таиландтан Қазақстанға пошта арқылы есірткі жіберген. Заңсыз заттар қарапайым тұтыну тауарлары ретінде жасырылған.
Осы есірткі партиясын алған үш адам бұған дейін әртүрлі мерзімге сотталған. Ал оны жіберген күдікті іздеуге жарияланып, кейін ұсталған соң сот алдында жауап берді. Нәтижесінде ол 8 жылға бас бостандығынан айырылды.
Бас көлік прокуратурасының хабарлауынша, екі іс бойынша да мемлекеттік айыптауды көлік прокуратурасы қолдаған. Шығарылған үкімдер әзірге заңды күшіне енген жоқ.
