USD
Астанада фельдшер Ұлдана Мырзуанның қазасына қатысты сот процесінде тағы бір жәбірленушінің денсаулығына келген ауыр зиян туралы айтылды. Сотта Айнұр Нұрпейісованың медициналық сараптама қорытындысы жарияланды.
Құжатты жәбірленуші тараптың адвокаты Жадыра Құрымбаева сот отырысында оқып берді.
Сараптама материалдарына сәйкес, Нұрпейісованың бас сүйегінің оң жақ самай және маңдай тұсында сынықтар болған. Кейбір сүйек бөліктері ішке қарай ығысқан. Жарақат салдарынан бас сүйегінің алдыңғы және ортаңғы аймақтары, сондай-ақ оң жақ самай бөлігі зақымданған.
Қорғаушының айтуынша, самай сүйегінің сынуы есту жүйкесіне де айтарлықтай зиян келтірген. Сонымен қатар құлақтың дыбысты қабылдайтын құрылымдары бұзылған.
Медициналық құжаттарда Айнұр Нұрпейісоваға жарақаттан кейінгі IV дәрежелі сенсоневралды кереңдік диагнозы қойылғаны көрсетілген. Соның салдарынан оның оң құлағы есту қабілетін толық жоғалтқан.
Адвокат бұл жағдайдың қайтымсыз екенін мәлімдеді. Оның сөзінше, оң құлақтың есту қабілетін хирургиялық жолмен немесе емдеу арқылы қалпына келтіру мүмкін емес. Сонымен қатар сол құлаққа түсетін жүктеменің артуы да оның естуіне кері әсер етуі ықтимал.
Осы себепті болашақта жәбірленушіге арнайы есту аппараты қажет болуы мүмкін.
Қорғаушы медициналық қорытындылар істің мән-жайын анықтау үшін маңызды екенін атап өтіп, соттан тиісті мамандарды шақыруды сұрады. Атап айтқанда, Нұрпейісоваға оқиғадан кейін медициналық көмек көрсеткен дәрігер мен нейрохирургтен жауап алуды өтінді.
Адвокаттың пікірінше, дәрігерлердің түсініктемесі әйелдің алған бас жарақаты мен кейін қалыптасқан есту қабілетінің жоғалуы арасында тікелей байланыс бар-жоғын анықтауға мүмкіндік береді.
Еске салайық, қайғылы оқиға 2025 жылғы 8 қарашада Астанада болған. Тұрғын үй қасбетінің бір бөлігі құлап, бірнеше адам зардап шеккен. Оқиға орнына жедел жәрдем фельдшері ретінде барған Ұлдана Мырзуан зардап шеккендерге көмек көрсетіп жатқан кезде құрылыс бөліктерінің астында қалған. Кейін ол алған жарақатынан көз жұмды.
Қазір осы іске байланысты тұрғын үйдегі мүлік иелері бірлестігінің төрайымы Сәуле Жұбаниязоваға қатысты сот талқылауы жалғасып жатыр.
