USD
3 қыркүйек күні Астанада әлемге танымал әнші Энрике Иглесиастың концерті өтеді. Музыкалық кеш сағат 20:00-де «Астана Арена» стадионында басталады.
Көрермендердің стадионға қауіпсіз әрі ыңғайлы жетуін қамтамасыз ету және көлік кептелісін азайту мақсатында елорда әкімдігі арена маңындағы бірқатар жолдарда уақытша қозғалыс шектеулерін енгізеді.
Атап айтқанда, көлік қозғалысына «Алау» мұз сарайы жағынан, яғни Марко Поло көшесі арқылы келетін бағытта және «Сарыарқа» велотрегі тарапынан, Месроп Маштоц көшесі бойында шектеу қойылады.
Көлікпен келетін тұрғындарға стадионға жақын маңдағы арнайы тұрақтарға көлігін қалдырып, әрі қарай шаттл автобустарды пайдалану ұсынылады.
Арнайы автобустар сағат 16:00-ден бастап төрт тұрақтан «Астана Аренаға» қатынайды. Концерт аяқталған соң көрермендер сол көлікпен бастапқы тұрақтарына қайта жеткізіледі.
Шаттл бағыттары мына тұрақтардан ұйымдастырылады:
- Елорда циркі маңындағы тұрақ;
- «Әзірет Сұлтан» мешіті маңындағы тұрақ;
- Қажымұқан көшесіндегі «Қазақстан» спорт кешені маңындағы тұрақ;
- «Нұр-Сұлтан» мешіті (Бас мешіт) маңындағы тұрақ.
Сонымен қатар «Астана Аренаға» LRT арқылы да тікелей жетуге болады.
Әкімдік концертке келетін тұрғындарға жолға алдын ала шығып, қоғамдық көлік пен шаттл қызметтерін пайдалануды ескертеді.
