USD
Қыркүйекпен бірге Қазақстанда күздің алғашқы белгілері сезіле бастайды. «Қазгидромет» мамандарының болжамынша, ел аумағында тамызбен салыстырғанда орташа айлық температура шамамен 5-7°С-қа төмендейді. Дегенмен айдың алғашқы бөлігінде кей өңірлерде жазғы ыстық қайта сезілуі мүмкін.
Синоптиктердің мәліметінше, қыркүйектің алғашқы күндері Қазақстанның батысы мен оңтүстігінде ауа райы жылы әрі ыстық болады. Ал солтүстік, орталық және шығыс облыстарда күзгі салқын орнап, жаңбыр жаууы ықтимал. Кей жерлерде жауын-шашынның қарға ұласуы және желдің күшеюі болжанады.
Айдың алғашқы онкүндігінің ортасына қарай елдің басым бөлігінде жауын-шашын тоқтап, күн жылынады. Батыс, солтүстік-батыс және оңтүстік-батыс өңірлерде күндіз ауа температурасы +25…+35°С-қа дейін көтерілуі мүмкін.
Солтүстік, орталық және шығыс облыстарда да температура біртіндеп жоғарылап, күндіз +22…+30°С шамасына жетеді. Оңтүстікте күндізгі температура +25…+35°С, оңтүстік-шығыста +25…+33°С аралығында болуы ықтимал.
