«Ауылдың жағдайына жаны ашымайды»: Тоқаев жерден пайда көретін бизнесмендерге қатысты пікір білдірді
Президент Қасым-Жомарт Тоқаев ауыл шаруашылығы саласында жұмыс істейтін кәсіпкерлердің әлеуметтік жауапкершілігіне назар аударды. Мемлекет басшысы ауылдың дамуына үлес қоспай, жерден тек табыс табуды көздейтін бизнесмендерге қатысты өз ұстанымын ашық жеткізді.
Бұл туралы Президент бүгін өткен Ауыл шаруашылығы еңбеккерлерінің үшінші форумында айтты.
Тоқаевтың сөзінше, мемлекет ауыл-аймағының өркендеуіне атсалысып, жерлестерінің жағдайын ойлайтын адал фермерлер мен іскер шаруаларды қолдауды жалғастырады. Алайда аграрлық салада қызмет етіп жүріп, ауыл өмірінен алшақ жүрген кәсіпкерлер де бар.
Мемлекет басшысы кейбір бизнесмендердің өз шаруашылықтарына да бармайтынын, жергілікті тұрғындардың мәселесіне назар аудармайтынын атап өтті. Оның айтуынша, мұндай кәсіпкерлер үшін ауыл шаруашылығы тек пайда табудың құралына айналған.
«Бізге жер қадірін білмейтін, халықтан алыс, ауыл шаруашылығын тек пайда табудың жолы ретінде қарастыратын адамдар қажет пе? Меніңше, жауабы анық. Қажет емес. Ендеше заң жүзінде шаралар қабылдау керек», – деді Президент.
Сонымен қатар Тоқаев аграрлық саладағы кәсіпкерлердің міндеті тек өнім өндіріп, табыс табумен шектелмеуге тиіс екенін айтты. Олар ауылдағы халықтың тұрмыс сапасын жақсартуға да үлес қосуы қажет.
Президент ауыл шаруашылығының ел экономикасы үшін стратегиялық маңызы бар екенін де еске салды. Оның пікірінше, аграрлық сектор Қазақстанның халықаралық нарықтағы бәсекеге қабілеттілігін арттыратын маңызды бағыттардың бірі. Әсіресе әлемдегі тұрақсыздық жағдайында бұл саланың рөлі күшейе түседі.
USD